Trump i heq mbrojtjen e Shërbimit Sekret Kamala Harris
Presidenti Donald Trump ka urdhëruar ndërprerjen e mbrojtjes nga Shërbimi Sekret për ish-nënpresidenten amerikane, Kamala Harris. Vendimi u bë publik përmes një letre zyrtare, të titulluar “Memorandum për Sekretarin e Sigurisë Kombëtare”, që CNN ka parë.
Sipas ligjit federal, ish-nënpresidentët gëzojnë mbrojtje për gjashtë muaj pas largimit nga detyra. Në rastin e Harris, ky afat përfundoi më 21 korrik 2025. Megjithatë, ish-presidenti Joe Biden kishte firmosur një direktivë të brendshme, duke i zgjatur mbrojtjen për një vit shtesë – një vendim që deri tani nuk ishte bërë publik.
Ky urdhër është anuluar nga Trump, i cili i kërkoi Departamentit të Sigurisë Kombëtare që nga 1 shtatori 2025 të ndërpresë çdo mbrojtje të veçantë ndaj Harris, përtej asaj që kërkohet me ligj.
Heqja e mbrojtjes vjen në një kohë kur Harris pritet të rikthehet në qendër të vëmendjes publike përmes një turneu librash, me rastin e publikimit më 23 shtator të kujtimeve të saj “107 Days”, ku ajo rrëfen përvojën gjatë fushatës së shkurtër presidenciale.
“Zëvendëspresidentja është mirënjohëse ndaj Shërbimit Sekret të Shteteve të Bashkuara për profesionalizmin, përkushtimin dhe angazhimin e tyre të palëkundur ndaj sigurisë”, tha këshilltarja e saj e lartë, Kirsten Allen, për CNN.
Kujtojmë se çështja e sigurisë së figurave politike është veçanërisht e ndjeshme në SHBA, sidomos pas dy atentateve të dështuar ndaj Trump gjatë fushatës së tij presidenciale vitin e kaluar.
